Pepar & Gulrot er fullstendig finansiert av gåvmilde lesarar frå heile verda. Alle desse sponsorane er viktige for utviklinga av nytt innhald, og dei vert, om dei ynskjer, takka i teksten på slutten av episodane. Denne ordninga gjer at Pepar & Gulrot held fram med å vera uavhengig, og nettstaden treng aldri ha reklame eller andre forstyrrande element.
Alt innhaldet eg lagar om Pepar & Gulrot på denne nettstaden og på bloggen min, er fritt tilgjengeleg for alle. Eg respekterer dykk alle like mykje, anten de har pengar eller ikkje. Alle bonusane eg lagar for sponsorane, vert òg lagde ut her. Pepar & Gulrot vil aldri forlanga betaling eller abonnement for tilgang til nytt innhald.
Eg ynskjer å gje alle retten til å dela, bruka, byggja og til og med tena pengar på det eg har laga. Alle sidene, teikningane og innhaldet er laga med fri programvare på GNU/Linux, og alle tilhøyrande kjeldefiler er tilgjengelege her på nettstaden (sjå «Kjeldefiler»- og «Lisens»-knappane). Eg oppfordrar til kommersiell bruk, omsetjing, teikningar av figurane, trykte bøker, filmar, dataspel og anna vidareformidling. Berre hugs å kreditera opphavspersonane (teiknarar, korrekturlesarar og omsetjarar som har vore med på å laga materialet du ynskjer å bruka), oppgje lenkje/adresse til lisensen og opplys om du sjølv har gjort endringar. Alle rimelege måtar å gjera dette på er greitt, men du kan ikkje gjera det på ein måte som gjer at det verkar som at opphavspersonane støttar deg eller måten du har brukt materialet på. Du finn meir informasjon her:
Creative Commons Navngivelse 4.0 Internasjonal-lisensen.
Pepar & Gulrot er ein humoristisk teikneserie for alle, uansett alder. Teikneserien inneheld aldri vakseninnhald eller vald. Som ein fri teikneserie med opne kjelder er Pepar & Gulrot eit stolt eksempel på kor kul fri kultur kan vera. Eg legg mykje vekt på kvalitet, etikk og profesjonalitet, sidan fri bruk og opne kjelder ikkje tyder sekunda vare – tvert imot!
Utan nokon mellommann mellom serieskaparen og publikum betalar du mindre og eg får meir. Du støttar meg direkte. Ingen forlag, distributørar, PR-team eller noko motepoliti kan tvinga meg til å endra Pepar & Gulrot til å passa deira syn på «marknaden». Kan ikkje ein einskild suksess forandra ein heil bransje i krise? Me får sjå …
Når eg ser tilbake på det eg skreiv her på heimesida for ti år sidan – «Ein fri nettserie, med opne kjelder, finansiert direkte av lesarane i håp om å endra teikneseriebransjen!» – vert eg slått av kor mykje bransjen no er endra. Var Pepar & Gulrot ein katalysator for nokre av desse endringane? Internett var ein svært annan stad før. Nettstriper hadde berre éin forretningsmodell: sal av profileringsartiklar og mottak av éingongssummar via PayPal. Fast sponsing var framleis i sin spede barndom.
Eg er stolt over at Pepar & Gulrot var ei av dei fyrste nettstripene på sponsortenesta Patreon. Tenesta var tidlegare teken i bruk av YouTube-arar som ville revolusjonera måten digitale kunstnarar vart støtta. I dag er slike sponsortenester normen; det er få kunstnarar som ikkje brukar dei.
Men ikkje alt eg kom opp med, har teke av. Avgjerda mi om å berre bruka fri programvare og laga ein heil teikneserie med dette, er eg nesten åleine om. Mange kunstnarar har valt ein meir tradisjonell modell der dei skapar opphavsrettsverna materiell og samtidig er avhengig av sponsorstøtte. Sjølv om denne modellen ofte gjev «fri tilgang» til innhaldet, meiner eg det er ein dårleg modell, sidan han ikkje garanterer slik fri tilgang.
Under modellen min finansierer ikkje berre lesarane innhaldsskapinga; dei får òg ein garantert og ugjenkalleleg tilgang til innhaldet, med rett til gjenbruk og redigering, òg kommersiell. Dette gjer at det alltid vil vera fritt og ope, ikkje låst bak betalingsmurar og lisensar. Eg meiner kort sagt at det som er finansiert av folket, bør tilhøyra folket.
Når eg ser på kvar bransjen er i dag, er eg endå meir overbevist om at metoden min var rett. Ikkje-fri programvare vert meir og meir plaga av personvernproblem og funksjonalitet – som Blockchain, NFT og KI – som berre investorane ynskjer. Samtidig slit kunstnarane med opphavsretten, der forlaga og plattformene kontrollerer kvar dei kan publisera åndsverka sine.
Så filosofien min er uendra. Eg meiner framleis at bruk av Creative Commons-lisensar og fri programvare er nøkkelen til ekte fridom og kreativitet. Formuleringa mi «Ein fri nettserie, med opne kjelder, finansiert direkte av lesarane i håp om å endra teikneseriebransjen!» er framleis ei viktig rettesnor for meg, sjølv om eg er i mindretal.
Eg veit eg berre er ein drope i havet, men eg er fast bestemt på å arbeida for ein opnare, friare og meir kreativ bransje. Eg er stolt over å vera ein del av ei rørsle som sakte, men sikkert har framgang, og eg er takksam overfor sponsorane mine for at de støttar meg på denne reisa.
− David Revoy